買得起就係時機 出自影帝張家輝為新戲宣傳的網上宣傳片，片中他化身一名地產代理，為了鼓勵大家買樓，張家輝便出動了本年度金句「 買得起就係時機 」，大家聽完不禁思考，難度買不起時才是時機?
新片《失戀急讓》嘅預告片近日喺網上熱播，主角張家輝扮地產代理賣廣告，入型入格，金句百出，最爆係最尾段
佢講嗰句：「幾時係買樓時機？你買得起嘅時候，就係買樓時機。」確實精準過「超人」李嘉誠成日都講嗰句：「買來自住，幾時都可以買」。
代理口頭禪─「盡做」
美聯物業住宅部行政總裁布少明承認，自己當年試過用呢句sell客，佢會話「你有能力就買啦，點知第日會唔會升到買唔起㗎！」不過唔係人人受落，「上車客，易sell，但投資者、換樓客喇喎，佢哋有經驗，有主見，比較難sell啲。」佢好老實咁講，客人唔會因為地產代理一句說話而「着燈」，如果真係咁易做，就個個做到top sales，代理仲有好多功夫要做，包括為客人分析後市。
另一位睇過條片嘅利嘉閣總裁廖偉強都大讚，張家輝呢句好精警，好多人成日問佢幾時可以買樓，佢話「好老實，邊個專家預計到樓市幾時升幾時跌呢？所謂能知三日事，富貴千萬年。」
阿廖又話，張家輝成日講「盡做」兩字，真係好到題，「客人無論有乜要求，我哋都唔會say no，亦唔講一定得，因為有承諾，到時唔得咁點算，所以盡做呢兩個字，幾好用。」
對於張家輝話「市場上最鍾意急起上來，乜得肯制嘅業主」，阿廖就話冇咁誇張，不過急起上來嘅業主，臨尾可能真係有令人意想不到嘅減價，試過有業主臨場即減5%。
照咁講，以後大家想問人幾時買樓好，睇睇自己個銀行戶口咪得囉。
引自︰http://hk.apple.nextmedia.com/financeestate/art/20140521/18727188
沒有留言 :
張貼留言